બીગ બીએ શેર કર્યા અ'વાદના અનુભવ, તસવીરો બની વાયરલ

ગુજરાતના બ્રાન્ડ એમ્બેસેડર અને બોલીવૂડ અભિનેતા છેલ્લા બે દિવસથી અમદાવાદમાં 'ખૂશ્બુ ગુજરાત કી' એડ ફિલ્મનું શૂટિંગ કરી રહ્યા છે. ગઈ કાલે તેમણે અમદાવાદમાં 100 વિન્ટેજ કારના કલેક્શનને નિહાળ્યું હતું. આ કલેક્શન જોઇને તેઓ પ્રભાવિત થઈ ગયા હતા. આ પછી તેમણે પોતાના ફેસબૂક એકાઉન્ટમાં યુનિક કાર સાથેની તસવીર તથા એખ ખેલૈયાના વેશમાં બેઠેલા બાળક સાથેની તસવીરો શૅર કરી હતી. જેને ફેસબૂક ફ્રેન્ડે વધાવી લીધી હતી.

કાર સાથેની તસવીરને અત્યાર સુધીમાં 30 હજારથી વધુ લાઇક મળી છે. જ્યારે 700થી વધુ લોકોએ કોમેન્ટ કરી છે, તો 800થી વધુ લોકોએ આ તસવીર શૅર કરી છે. ખેલૈયાના વેશમાં રહેલા બાળક સાથેની તસવીર 16 કલાકમાં એક લાખથી વધુ લોકોએ લાઇક કરી છે. બે હજારથી વધુ લોકોએ શૅર કરી છે, તેમજ આ તસવીર પર એક હજારથી વધુ કોમેન્ટ આવી છે.

અમિતાભે ફેસબૂક પર લખ્યું છે કે, મેં અમદાવાદમાં કેટલાક યુનિક લોકેશનની મુલાકાત લીધી, જેમાં 100 વિન્ટેજ કારનું કલેક્શન અદભૂત હતું. ઉપરાંત તેમણે અમદાવાદના લો ગાર્ડન, એન્ટિક કાર મ્યુઝિયમ, મજાર અને ઐતિહાસિક સ્થળની મુલાકાત લીધી હોવાનો તથા તેનાથી ઇતિહાસ અને તેના જ્ઞાનમાં વધારો થયો હોવાનું જણાવ્યું છે.